Synd og Sorg er Systkin-Ord

1 Synd og Sorg er Systkin-Ord,
Fylgjast jamnan her paa Jord.
Synd fraa Gud oss heve skilt,
Difyr lid vaart Hjarta illt:
Hjartat, som aat Gud er skapt,
Syrgjer, naar det Gud hev tapt.

2 So er Hjartat sjukt og saart,
Til me sjaa den Sanning klaart:
Synd til all vaar Sott er Rot,
Men i Krist er Helsebot;
Og med Syndesorg og Tru
Um fraa Synd til Gud me snu.

3 Hjartat daa i Jesus Krist
Finner Freden, som var misst,
Fred, som yvergjeng alt Vit,
Giv vaart Liv ein annan Lit;
Fred, som stiller all vaar Trong,
Løyser Sorgi upp i Song.

4 Vel eg enn ein Syndar er,
Difyr stend og Sorgi nær:
Harm og Hygnad skiftast aat,
Gleda blandast tidt med Graat;
Men igjenom skyer graa
Kann eg Jesu Aasyn sjaa.

Source: M. B. Landstads Kirkesalmebog og "Nokre Salmar" ved Professor Dr. E. Blix, samt følgende tillæg: Kirkesalmeboger og Almedigter af Biskop J. N. Skaar, med 79 portræter, og Kirkemusiker og Kirkemusik... #762